2024 Mimkut thla ni 25:

Vawiin khan Convention Centre Lungleiah Lunglei Municipal Council (LMC) huam chhunga hmasawnna tluantling leh tlo a awm theihna tura Localisation of Sustainable Developement Goals (LSDG) kal tlanga hma lakna tur chu Adviser to Chief Minister (Finance & Planning) Pu TBC Lalvenchhunga MLA chuan a hawng.

Khuallian leh LSDG 2024 under LMC hawngtu Pu TBC Lalvenchhunga chuan hmasawnna tluantling, nghet leh tlo a awm theihna tura mipui mimir huapa hma lakna (Localisation of SDG) chu kalphung thar sawrkar ruahmanna pawimawh tak, "Bana Kaih" hnuaia hma lakna peng pawimawh tak pakhat a ni tih sawiin, LMC huam chhungah hlawhtling taka kalpui a nih a beisei thu a sawi a. SDG tehna hnuhnung berah Mizoram chu tehfung ṭhenkhatah kan dinhmun a ṭhat viau laiin rethei leh hausa inkar zau zawngah kan hniam hle a, he'ng kan hniamnate hi siam rem a, hma sawn tura ngaihtuahna sen leh hma lak a ngai, a ti a. Ram hmasawnna tura hma lakna reng rengah a daih rei ang em tih leh chhuan lo la awm turte tan a him ang em tih ngaihtuah tel a ṭul tih sawiin, LSDG hnuaia tihhlawhtlin tur hrang hrangte chu khawpui nuam, chenna tlak siam tura pawimawh tak tak a nih bakah, mipui vantlang huap zo hma lakna a ni chu a hlu hle a ni, a ti. 

Pu TBC Lalvenchhunga chuan Mizorama hmasawnna kan sawia kan rilrua lang lian ber chu cement concrete building lianpui pui din khup a ni ṭhin tih sawiin, concrete ngaw siam chu khawpui nuam leh changkang nihna a ni lo tih kan hriat a, kan rilru put hmang kan thlak a ṭul tawh hle a ni, a ti a. Vantlang hmun awl hman ṭangkai dan turah ngaihtuahna zau tak pu leh thui tak thlir chunga ruahmanna siam thiam a pawimawh thu sawiin, sum sen tam ngai lova veng chhung hmun awlte leh khawii lai emaw sual rawngbawl nana miin an hman ṭhinte pawh khawtlang leh mipui tana hmun nuam leh ṭangkai zawka siam dan te, hmasawnna tur ruahmanna reng reng kan mamawh em, mahnia inenkawl zo leh sum thawk chhuak thei a ni dawn em, kan chhehvel boruak, leilung leh vantlang tana hnawksak a ni thei ang em, tihte ngaihtuah ṭhin a pawimawh, a ti a. LMC councillor-te chu Ward hmasawnna tluantling atan central sum hai chhuah theiha inel tur te, Local Council-te pawh LSDG target tihhlawhtlin tum ngawr ngawr lo va, data dik leh felfai a awm theih nan rinawm taka mahni nihna anga lang ngam tur leh hmasawnna tluantling leh daih rei um zawk tur tea chahin, mipuite pawh sawrkar leh khawtlang hruaitute kuta hma lakna bur bun mai lo va, mahni zawnah ṭheuh a tihlawhtlingtu leh ngaihtuahna senga tha thawhtu nih tum turin a chah a ni. 

LMC huam chhunga LSDG kalpui tur hawnna inkhawm hi Planning & Programme Implementation Secretary Pu Lalmalsawma Pachuau IRS chuan kaihruaiin, Lungleia LSDG kalpui tur chu Planning & Programme Implementation Department leh LMC te thawh honaa kalpui tur a nih thu a sawi a. LMC Chairman Pu Lalzuithanga chuan Lunglei chu khawpui mahnia inrelbawlna nei a nih tawh avangin LMC leh Local Council-te thawh honain khawpui hmasawn nan theih tawp chhuaha hma lak a ni dawn tih a sawi a. LSDG 2024 hma lakna chu khawpui hmel tidanglam zawt zawt thei tur a nih angin theih tawp chhuaha tihhlawhtlin tum a ṭul tih sawiin, hmasawnna ngelnghet a awm theih nana tum ram (goal) 17 hmang chuan mahni inenfiahin, hmasawnna kawng zawh an tum dawn tih a sawi a. LSDG-in a tum chu sum leh pai leh hmasawnna ruhrel din uaih uaih lam aiin khua leh tuite'n rilru hrisel leh dik an put aṭanga hmasawnna nghet leh tlo a awm theihna tur, pawn lam aia chhung lam aṭanga hmasawnna zawk a ni tih sawiin, local council, tlawmngai pawl leh mipuite nen phei khai rual taka thawk hova tihhlawhtlin tur a nih thu a sawi. 

He hunah hian P&PI Department-a Economist-cum-Under Secretary Pi B. Vanlalruati chuan LSDG 2024 awmzia leh a thil tumte bakah, a taka tihhlawhtlin dan turte leh khawpui hmasawnna atana a ṭangkai dan turte a sawifiah a. LMC huam chhunga LSDG 2024 tihlawhtling tura local level-a hma lak dan tur kawng hrang hrang tar langin, theme 9 hnuaia Urban Indicator Framework tehfung 49 hmangin ward tinte teh an nih dawn thu leh intehna hi thawh (phase) hniha kalpui tum a nih thu a sawi a. Phase 1-ah April - September, 2024 chhunga local council tin dinhmun tehna chu October thlaah leh Phase 2-ah October 2024 - January 2025 chhung dinhmun chu February thlaah lak a ni dawn tih sawiin, data hi Government J. Buana College zirlaite'n lain, a ti ṭha ward pathumte hnenah incentive grant pek a ni dawn tih a sawi bawk.

Vawiina LSDG 2024 under LMC hawnna inkhawmah hian Lunglei West bialtu MLA Pu T. Lalhlimpuia bakah, LMC-a councillor-te, sawrkar official-te, local council member-te, tlawmngai pawl hrang hrang ai awhte, political party hruaitute, MJA member-te leh Lunglei Government College, Government J. Buana College leh Nursing School Lungleia zirlaite leh zirtirtute an tel a. LMC Chief Executive Officer Pu Donny Lalruatsanga'n lawm thu sawiin hun a khar a. Chawhnu lamah P&PI Department mi thiamte nen LSDG kalpui dan tur chipchiar zawka zir hona (technical session) hun hman zui a ni.