Lunglei, 2025 Nikir thla ni 3: Lunglei Municipal Council (LMC) hnuaia Lunglei khawpui chu bawlhhlawh awm lohna khawpuia siam tura, 'Garbage Free City Lunglei Project' kalpui tur chu Nikir Thla Ni 2 2025 @ 1:00 P.m khan Mizoram sawrkara Health & Family Welfare Minister Pi Lalrinpuii chuan Lunglei Convention Centre Convention Hall-ah a hawng.

Garbage Free City Lunglei Project hawngtu Pi Lalrinpuii chuan LMC hotute'n hmathlir thui tak neia bawlhhlawh awm lohna khawpui siam tura ruahmanna an nei chu lawmawm leh phurawm a tih thu sawiin, a hlawhtlin nan sawrkar leh mipui thawh hona ṭha tak neih a pawimawh dawn tih a sawi a. Garbage free city project kalpui turah chuan chhungkaw tina nute chu a pawimawh hmasa an nih tur thu sawiin, bawlhhlawh thliar hran leh sawngbawl chu nuhovin choka aṭanga an ṭan a, chhungkuaah bawlhhlawh paih dan dik leh faina chungchang an inzirtir chuan a hlawhtlingin, a rah chhuah hmuh tur a awm thuai ang, a ti a. Khawpui fai ni turin bawlhhlawh siamtu leh leilung tichhetu plastic ang chi te hman tlem a, a hman nawn theih hman nawn a, a thehthang kawngah fimkhur a ṭul thu sawiin, tui chhawp nan plastic bur aia saidawium hman te, bazarnaah plastic bag leh polythene hmang lova em emaw, bazar ip pangngai emaw hman hram hram te a pawimawh thu a sawi a. Kuhva khungna sarang, chinai leh kuhva eina nawi leh chil te thlahdah loh va, khawlaia bawlhhlawh bawm hunte hman ṭangkai leh enkawl zui a pawimawh thu te sawiin, Lunglei khawpui chu khawpui fai, thianghlim, mawi leh nuam a nih theih nan khua leh tui zawng zawngte ṭang ruala theih tawp chhuah turin a chah a ni.

H&FW Minister Pi Lalrinpuii chuan mi rethei leh harsa zawkte hmakhua ngaiin sawrkarin hma lakna tam tak a kalpui tih sawiin, thihna tuar an awma ruang phurhna sawrkarin a kut ken chu mi harsate tana sawrkar hma lakna lawmawm tak a nih thu a sawi a. Damloh nikhuaa puk chawp leh a ba thlaa damdawi in aṭanga inkhul chhuak ṭhinte tan pawh pawisa chawi ngai miah lova an inenkawl theih dan tur - Mipui Healthcare (MUHCS) sawrkarin a duan chhuah chu mipuite tana malsawmna a nih thu a sawi bawk.

Garbage free city project hawnna hunah hian Lunglei South bialtu MLA Pu Lalramliana Papuia pawh telin, LMC Chairman Pu Lalzuithanga leh LMC councillor-te leh thawktute, sawrkar official-te, local council ai awhte, YMA, MHIP, MUP leh MJA ai awhte, Nursing School Lunglei leh HATIM zirlaite, political party hruaitute leh sawm bikte an kal khawm a. LMC-a Executive Councillor Pu Zorinsanga Hmar chuan hun kaihruaiin, LMC Chairman Pu Lalzuithanga'n inlawmna thu a sawi a. Baptist Church of Mizoram (BCM) Communication Department Director Rev. Lalhmunsanga'n hunserh hmangin, LMC Vice Chairman Pu K. Lalrinawma'n LMC hnuaia faina leh thianghlimna kawnga hma lakna kalpui chhoh dan a sawi a. LMC Chief Executive Officer Pu Donny Lalruatsanga'n project sawi hawnna leh thlir lawkna hun hmangin, LMC Executive Councillor Pi Lalhruaitluangi Sailo chuan lawm thu sawiin hun a khar a ni.

Lunglei khawpui chhunga faina leh thianghlimna kawnga hma lakna hi Local Administration Department (LAD)-in kengkawh ṭhinin, Urban Development & Poverty Alleviation (UD&PA) chuan a chhunzawm a. Lunglei Municipal Council (LMC) din a nih hnuah bawlhhlawh sawngbawl chu LMC subject a nih angin LMC chuan hma la zuiin, nikum 2024 khan ward fai inelna 'LMC Award' a buatsaih a. Hemi zul zui hian Municipal Sanitation Committee chuan Garbage Free City Project kalpui tura rawtna siamin, LMC Board of Councillor meeting chuan May ni 2, 2025 khan a pawmpui a, ruahmanna siam zui a ni ta a ni.

Garbage Free City Lunglei Project hi kumin 2025 hian LMC Award 2024-a ward faia thlan chhuah ward pali - ward number 1, 2, 9 leh 11-ahte pilot project anga kalpui hmasak tura ruahman niin, he'ng ward chhungah hian veng (local council) pakua - Pukpui, Zotlang, Serkawn, Zohnuai, Lunglawn, Salem, Zobawk North, Zobawk South leh Lungpuizawl te an awm a. Pilot project atan hian cheng nuai 60 vel ruahman a ni a. Kum tin ward dangah kalpui belh zelin, kum 3 chhungin ward 11 tuam chhuah tum a ni a. Kum 2026-ah ward no. 3, 6, 7 leh 8 tih belhin, kum 2027-ah ward no. 4, 5 leh 10-ah te hma lak belh a ni ang.

Garbage Free City Lunglei Project hi sawrkar department, zirna in, local council, tlawmngai pawlte leh mipui zawng zawng nen ṭang hova hma lakna tura ruahman a ni a. Mipui zirtirna hun buatsaih te, inzirtirna thuziak tar te, bawlhhlawh sawngbawlna ṭha zawk ruahman te, khawtlang faina hnatlang buatsaih te, zirna ina garbage free squad din te, pawl hrang hrangah member-te inzirtir leh mipuite faina kawnga hma la tura intiamtir te chu hma lakna tur leh hmachhawp langsar a ni a. A ṭul dan leh remchan dan angin inelna leh intihsiakna te pawh buatsaih tum a ni.