Lunglei, 2025 Nikir thla ni 19:Nimin  khan Lunglei Municipal Council (LMC) Executive Councillor Pu Zorinsanga Hmar chuan LMC BoC Hall-ah LMC Property Tax Website - property.lmclunglei.com chu a taka hman theih turin a tlangzarh.

LMC-a Property Tax changtu Executive Councillor Pu Zorinsanga Hmar chuan inkhawm kaihruaiin, Property Tax chungchang a sawi fiah a. LMC Chief Executive Officer (CEO) Pu Donny Lalruatsanga chuan LMC hma lakna leh website hman dan tur te a sawi fiah a. Thu thar la khawmtute'n zawhna an neihte an zawt bawk a ni.

Pu Zorinsanga Hmar chuan property tax chu Lunglei hma sawnna hna thawhna tura Lungleia chengte'n an thawh khawm tur a nih thu sawiin, LMC-in property tax khawnna tur rate a bithliah chu a hniam thei ang ber an hman thu leh mipui tana phurrit siam lo thei ang ber turin fimkhur taka ruahmanna an siam thu a sawi a. LMC sum hnar lian ber, Urban Local Body (ULB) Grant Fund dawng turin LMC huam chhunga property tax khawn leh khawn loh chu tehfung pawimawh tak a nih thu sawiin, property tax khawn a nih loh chuan ULB Grant Fund chu inpek loh palh awm thei a nih thu a sawi.

Pu Zorinsanga Hmar chuan in chhung bungrua leh lirthei neih aṭang tein LMC-in chhiah a la dawn ni awma insawi ṭhaihna awm chu thu belh chian dawl lo a nih thu sawiin, LMC chuan ram ruakah pawh property tax hi la lovin, building ding lai aṭang chauhvin chhiah a la dawn tih a sawi a. LMC-in property tax khawn lohna tura dana a telh - kohhran, thlanmual, zirna in leh hostel tih loh, sawrkar building zawng zawng pawhin property tax hi an pek a ngai dawn tih sawiin, building ding lai, an chhiah chawi tur zat cheng 180 aia tlemte chu Board of Councillors-in chhiah an awl a phalsak thei thung tih a sawi.

LMC CEO Pu Donny Lalruatsanga chuan LMC property tax chu online hmangin emaw, local council leh LMC office kal tlang emawin a pek theih dawn tih sawiin, mipuiin property tax an pek aṭangin za zela 95 chu mipui tana hman leh vek tur a nih thu a sawi a. Ward committee-ah za zela 80 leh local council kutah za zela 15 a kal dawn tih sawiin, LMC-in property tax khawnna enkawlna senso atan za zela 5 a chan ve tur thu a sawi a. LMC awm hmain property tax ang chu Revenue Department-ah pek a nih thu leh Lunglei khawpui tan bik hman theih a nih loh thu sawiin, tunah chuan property tax chu LMC-ah chhung khawmin, Lunglei khawpui chhunga mahni veng ṭheuh hma sawnna hna thawh nan hman a ni tawh dawn tih a sawi. 

LMC thuneitute chuan Lunglei khawpui chhunga vengte chu category-ah ṭhenin, zir chianna beh chhanin property tax chawi tur zat chu puanzar a ni dawn tih an sawi a. Mahni chawi tur zat chungchanga sawisel duh neite tan pawh hun hawn chhungin sawisel theih a nih tur thu an sawi bawk. 

Vawiina tlangzarh tak LMC Property Tax Website siamtu tur hi open tender hmanga zawn niin, Lailen Consultancy Pvt Ltd te'n cheng nuai 10 sengin an siam a. He website - property.lmclunglei.com-ah hian mahni chhiah pek tur zat en theih a nih bakah, online hmanga chhiah pekna portal te dah tel a ni bawk.