LMC-in Lunglei District Police kutah Lunglei khawpui chhunga lirthei leh mipui chet velna (traffic) him leh felfai zawk a awm theih nana kawngpui leh a vel cheina tur sum an hlan

Lunglei, 2025 Vawkhniahzawn thla ni 9: Vawiin khan Lunglei Municipal Council (LMC) chuan Lunglei khawpui chhunga lirthei leh mipui chet velna (traffic) him leh felfai zawk a awm theih nana kawngpui leh a vel cheina leh siam ṭhatna atan kum 2024-2025-a lirthei hun man (parking fee) an khawn chhuah aṭangin cheng nuai 5.41 (₹ 5,41,075/-) chu Lunglei District Police kutah an hlan.

Lunglei khawpui chhung kawngpui leh a vel cheina tur sum inhlanna hi LMC Chairman hna thawh pindanah buatsaih niin, LMC Vice Chairman leh Traffic & Transport Coordination (TTCC) Committee Chairman Pu K. Lalrinawma chuan a kaihruai a. LMC Chairman Pu Lalzuithanga chuan Lunglei District Superintendent of Police (SP) Pu J. Lalmuankima kutah sum hi a hlan a ni.

LMC Chairman Pu Lalzuithanga chuan LMC-in faina leh thianghlimna (sanitation) leh lirthei tlan dan leh hun dan ruahmanna (traffic management) a ngaih pawimawh thu leh hma a lak chhoh mek thu sawiin, lirthei chet velna kaihhnawiha ruahmanna siam turin LMC hnuaiah Traffic & Transport Coordination Committee (TTCC) din a nih thu a sawi a. A taka hma latu, LMC leh TTCC kutke ber leh an rin chhan ber chu SP leh Traffic Police te an ni tih sawiin, an ṭawiawmna leh thawhpuinaah lawm thu a sawi a, Lunglei khawpui chhunga lirthei hun dan leh tlan dan felfai zawk leh him zawk a awm a, khawpui hmelhmang pawh a mawi zel theih nan ṭan la zel turin a chah bawk.

Lunglei SP Pu J. Lalmuankima chuan District Police te'n kawngpui leh a vel cheina atana an ruahmannate a hlawhtlin theih nana LMC-in sum mamawh an pek avangin lawm thu a sawi a. Lunglei khawpui chu traffic kaihhnawiha chei rem tak a nih thu sawiin, lirthei leh mipui veivak tana him, tlan leh hmuh nuam taka chei chhoh zel an tum thu a sawi a. Lirthei hun dan leh tlan dan chungchangah te, kawngpuia dan leh hrai zawm chungchangah te pawh khauh zawka hma lak zel an tum thu a sawi.

Sum inhlannaah hian LMC Chief Executive Officer Pu Donny Lalruatsanga, Secretary Pi Zoramdini, Finance & Accounts Officer Pu Lalmawizuala Ralte, DIPRO Pu C. Lalhruaitluanga, Traffic Incharge Pu Lalṭhabuanga leh MJA President Pu H. Lalthansanga te pawh an tel a. Lunglei khawpuia lirthei chet vel dan him leh felfai zawk a awm theihna tura an ngaih pawimawh hrang hrangte an sawi ho nghal a ni.

LMC-in kum 2024-2025 chhunga parking fee a hmuh cheng nuai 18.31 (₹ 18,31,349/-) chu Board of Councillors (BoC) chuan traffic kaihhnawih hrang hrang tihchangtlun nana hman tura relin, hemi aṭang hian traffic kaihhnawihah leh kawngpui chhinchhiahna (marking) siam nan cheng nuai 4.86 (₹ 4,86,275/-) hman a lo ni tawh a. Sum bang la awm aṭangin tun ṭumah hian kawng lai cheina leh tilang fiahtu eng (reflector/road stud light) vuahna atan te, kawng kual laia darthalang (convex mirror) dahna atan te, chhinchhiahna hrang hrang siamna atan leh tiang eng thei (light stick), kawng danna chi hrang hrang (barricade, tape, cone, sign post, etc.), lirthei ke chehna (wheel clamp) leh hmanraw mamawh hrang hrang leina atan cheng nuai 5.41 (₹ 5,41,075/-) chu District Police kutah hlan a ni a. Hei bakah hian tui luan kawr khuhna ṭha lo siam ṭhat te, kawng leh kawng sir kea kalna daidanna pal (railing) rawng hnawih te, kawngpui luan chin baka lung phah leh hna ṭul dangte pawh la thawh chhunzawm zel tum a ni.